«Даму» қоры «Бизнестің даму картасы-2020» бағдарламасын жүзеге асырудағы негізгі оператор қызметін атқаратын болады. 2009 жылы аталған қордың тікелей атсалысуымен 2,5 мың жоба қаржыландырылса, 2010 жылы аталған көрсеткішті ұлғайту көзделген. Қазір Қазақстандағы шағын және орта бизнестің ішкі жалпы өнімдегі үлесі 16 пайыздан аспайды. Елбасы биылғы Жолдауында аталған көркеткішті 40 пайызға ұлғайтуды тапсырды. Және 162 жобаны жүзеге асыруға 6,5 трлн. теңге бөлінетіндігін жеткізген болатын. Бұл жобалар алдағы 3 жылда 200 мың қазақстандықты жаңа жұмыс орнымен қамтымақ. Ал еліміздің бизнес қауымдастығы индустриалды-инновациялық жобаларды жүзеге асырудың тиімді жолдарын қарастыруда.

Бексұлтан Құрманқұлов, «Даму» КДҚ басқарма төрағасының қоғаммен байланыстар жөніндегі кеңесшісі:
- 2009 жылы біз алдағы 10 жылдық стратегиямызды дайындап, оны «Самұрық-Қазына» қоры жанындағы қоғамдық кеңестен талқылаудан өтті. Бұл 10 жылдық бағдарламамыз алдағы 10 жылдағы ШОБ дамудың негізгі жолдары көрсетілген құжат дейміз. Өздеріңізге белгілі Елбасының Жолдауында кәсіпкерлік және ШОБ экономиканың қозғаушы күші ретінде айқындалды. Енді біздің бұған дейінгі жүргізген бағдарламамыз да, және ұсынып отырған негізгі стратегиямыз да, оның негізгі принциптері мен жолдары айқындалған болатын.

Статистикалық агенттіктің мәліметі бойынша, бүгінде Қазақстанда 290 мың шағын және орта кәсіпорын, 700 мыңға жуық кішігірім бизнесі бар жеке кәсіпкер тіркелген. Дағдарысқа қарамастан, 2009 жылы 100-ден астам шағын және орта кәсіпорын ашылды. Бірақ, кәсіпкерлер әкімшілік кедергілерді әлі де азайту керек деп есептейді.

Наталья Ахшабаева, тігін фирмасының директоры:
- Қазір СТ 1 сертификатын алу өте қиын. Бұл құжатты сауда өнеркәсіптік палатасынан алу үшін, кем дегенде 2-3 ай уақытың кетеді. Онда көптеген құжаттар өткізіп, сен отандық кәсіпкер екеніңді дәлелдеуің керек.

«Бизнестің даму картасы-2020» бағдарламасында кепілдікке қоятын мүлкі жеткіліксіз кәсіпкерлерге қолдау көрсету көзделген. Осы мақсатта бюджеттен 1 млрд. теңге қаржы бөлінбекші.