Ертең елімізге Еуропалық Комиссияның Сауда мәселелері жөніндегі өкілдері келеді. Сапар аясында Қазақстан мен Еуропалық Одақ арасындағы екі жақты сауда қарым-қатынастарының өзекті мәселелері талқыланбақ. Атап айтқанда, Дүниежүзілік сауда ұйымына мүше болу, Еуропалық Одақ тарапынан Қазақстанды нарықтық экономикасы бар мемлекет ретінде тану және отандық өнімдердің еуропалық нарыққа шығу мүмкіндіктерін арттыру мәселелері қозғалмақ. Ал 9-10 ақпан аралығында Ұлан-Батырда Қазақстанның Еуропадағы Қауіпсіздік пен ынтымақтастық ұйымына төрағалығы аясында және Моңғолия үкіметінің қолдауымен «Құлдықтың қазіргі түрлерімен күрестегі ұлттық, аймақтық және халықаралық тәжірибе атты» семинар өтеді.
9-11 ақпан аралығында Нидерландтың Гаага қаласында Ядролық қауіпсіздік жөніндегі ғаламдық саммитті дайындау жөніндегі ұлттық үйлестірушілердің кезедесуі жоспарланған. Ал 10-12 ақпан аралығында еліміздің Мемлекеттік хатшысы-сыртқы істер министрі Қанат Саудабаевтың шақыруымен Астанаға ресми сапармен Түркия Республикасының Сыртқы істер министрі Ахмет Давутоглы келеді.

Асқар Абдырахманов, ҚР Сыртқы істер министрлігінің ресми өкілі:
- Сапар бағдарламасында түркиялық дипломатия жетекшісінің Қазақстан басшылығымен бірқатар кездесулері белгіленген. Солардың барысында Астана мен Анкара арасындағы саяси, экономикалық, мәдени-гуманитарлық салаларда екіжақты және көпжақты ынтымақтастық мәселелері талқыланбақ. Атап айтқанда, Біріккен Ұлттар ұйымы, ОБСЕ, Ислам конференциясы ұйымы, Түркітілдес мемлекеттердің ынтымақтастық Кеңесі секілді бірқатар халықаралық құрылымдар аясындағы өзара ықпалдастық мәселелері жайында пікір алмасу жоспарланған.